ब्रह्माण्डमा किन कम ताराहरू बनिरहेका छन् ? चिनियाँ वैज्ञानिक अध्ययनले खुलायो नयाँ संकेत

काठमाडौं । चिनियाँ वैज्ञानिकहरूले विश्वकै विशाल रेडियो दूरबिनमध्ये एक चीनको फाइभ हन्ड्रेड मिटर एपर्चर स्फेरिकल टेलिस्कोप ( एफएएसटि) र डार्क इनर्जी स्पेक्ट्रोस्कोपिक इन्स्ट्रुमेन्ट (डिईएसआई) प्रयोग गरेर ब्रह्माण्डमा नयाँ ताराहरू बन्ने दर घट्नुको कारणबारे महत्वपूर्ण नयाँ संकेत फेला पारेका छन् ।

अनुसन्धानका अनुसार पछिल्ला करिब ४ अर्ब ५० करोड वर्षमा ब्रह्माण्डमा ताराहरू बन्ने दर तीव्र रूपमा घटेको भए पनि ताराहरू निर्माण गर्न आवश्यक प्रमुख इन्धनमध्ये एक मानिने न्युट्रल एटोमिक हाइड्रोजनको भण्डार भने तुलनात्मक रूपमा स्थिर रहेको पाइएको छ ।