रहेनन् कतारका पूर्वअमिर शेख हमद बिन खलिफा अल थानी

काठमाडौँ । कतार सरकारले आफ्ना पूर्वनेता शेख हमद बिन खलिफा अल थानीको दुःखद निधन भएको घोषणा गरेको छ। कतारको अमिर कार्यालय (दीवान) ले सामाजिक सञ्जालमार्फत आधिकारिक विज्ञप्ति जारी गर्दै पूर्वअमिर शेख हमदको निधनप्रति गहिरो दुःख व्यक्त गरेको छ र उनीप्रति उच्च श्रद्धाञ्जली अर्पण गरेको छ। उनले सन् १९९५ देखि २०१३ सम्म कतारको अमिरका रूपमा देशको नेतृत्व गरेका थिए।

शेख हमदलाई सीमित आर्थिक स्रोत भएको एउटा सानो खाडी राष्ट्रलाई विश्वकै धनी र शक्तिशाली मुलुकहरूको सूचीमा पुर्‍याउने आधुनिक कतारको प्रमुख योजनाकारका रूपमा हेरिन्छ। उनकै नेतृत्वकालमा कतारले प्राकृतिक ग्यास र तेल क्षेत्रको उपयोग गर्दै तीव्र आर्थिक विकास हासिल गर्‍यो र क्षेत्रीय तथा अन्तर्राष्ट्रिय मञ्चमा आफ्नो बलियो कूटनीतिक प्रभाव विस्तार गर्‍यो। उनकै शासनकालमा सन् १९९६ मा विश्वप्रसिद्ध अन्तर्राष्ट्रिय समाचार संस्था ‘अल जजिरा मिडिया नेटवर्क’ को स्थापना भएको थियो, जसले अरब जगतको पत्रकारितालाई विश्वस्तरमा स्थापित गर्‍यो।