मैवाखोलामा बालबालिकालाई मदिरा र सूर्तिजन्य पदार्थको बिक्री–ओसारपसारमा रोक

गाउँपालिका अध्यक्ष विजयप्रकाश वनेमका अनुसार नियमावली बालबालिकाको संरक्षण, विकास, सहभागिता र सर्वोत्तम हित सुनिश्चित गर्ने लक्ष्यका साथ तयार गरिएको हो। नियमावलीले गाउँपालिका क्षेत्रका सबै विद्यालयको दुई सय मिटर वरपर मदिरा तथा सूर्तिजन्य पदार्थको बिक्री, वितरण र सेवनमा प्रतिबन्ध लगाएको छ। साथै, बालबालिकालाई अश्लील सामग्री वा मदिरा तथा सूर्तिजन्य वस्तुको प्रचारप्रसारमा प्रयोग गर्न पनि रोक लगाइएको छ।

बालमैत्री वातावरण निर्माणलाई प्राथमिकता दिँदै प्रत्येक वडामा बाल पुस्तकालय, बाल सिर्जना केन्द्र तथा खेलकुदका आवश्यक पूर्वाधार विकास गर्ने योजना अघि सारिएको छ। जन्मदर्ता, नागरिकता, खोप, पोषण, स्वास्थ्य सेवा तथा बालमैत्री भौतिक संरचनामा सबै बालबालिकाको सहज पहुँच सुनिश्चित गर्ने प्रतिबद्धता पनि नियमावलीमा उल्लेख छ।