भोटेकोशी बाढी : भन्सार विभागद्वारा उद्धार र व्यापार सहजीकरणका लागि सम्पर्क व्यक्ति तोकिए

काठमाडौं । तिब्बततर्फबाट भोटेकोशी नदीमा आएको भीषण बाढीका कारण रसुवा र नुवाकोट लगायतका जिल्लामा पुगेको ठुलो क्षतिप्रति अर्थ मन्त्रालय, भन्सार विभागले गहिरो दुःख व्यक्त गरेको छ । बाढीले सर्वसाधारण, भन्सारका कर्मचारी, व्यवसायी र मालवाहक सवारी साधनका चालकहरूलाई प्रत्यक्ष प्रभाव पार्नुका साथै भौतिक संरचना र व्यापारिक मालवस्तुमा समेत क्षति पुर्‍याएको सन्दर्भमा विभागले आज एक अत्यन्त जरुरी सूचना जारी गर्दै उद्धार र व्यापार सहजीकरणका लागि पहल सुरु गरेको हो ।

विभागले रसुवा लगायत प्रभावित क्षेत्रमा कार्यरत सम्पर्कविहीन वा घाइते भएका भन्सार प्रशासनका कर्मचारी तथा उनीहरूका परिवारजनको अद्यावधिक अवस्था बुझ्न र आवश्यक सहयोगका लागि तीन जना शाखा अधिकृतहरूलाई सम्पर्क व्यक्तिको रूपमा तोकेको छ । जसअनुसार कर्मचारी र उनीहरूका परिवारले शाखा अधिकृत कुमार घिमिरे (९८४१३६५९४८), भरतमणि सापकोटा (९८४९६४५०३०) र शिवराज बोहरा (९८४९९३२२०२) सँग सम्पर्क गरी सहयोग लिन सक्नेछन् ।