राष्ट्रिय चलचित्र पुरस्कारभन्दा ठूलो यसको गरिमा

चलचित्र विकास बोर्डले हरेक वर्षझैँ यस वर्ष पनि सिनेमाका विभिन्न ९ विधामा राष्ट्रिय पुरस्कार प्रदान गरेको छ । राष्ट्रपति भवनमा विशेष समारोह आयोजना गरी राष्ट्रपतिबाट प्रदान गरिने यो पुरस्कार नेपाली सिनेमा क्षेत्रका लागि सबैभन्दा प्रतिष्ठित पुरस्कारमध्ये एक हो ।

कुनै पनि कलाकार, प्राविधिक वा सिनेकर्मीका लागि राष्ट्रको तर्फबाट प्रदान गरिने राष्ट्रिय पुरस्कार र सम्मान विशेष महत्वको विषय हो । यसले सम्बन्धित व्यक्तिको योगदानको कदर गर्नुका साथै समग्र क्षेत्रलाई पनि प्रोत्साहन प्रदान गर्दछ । तर दुर्भाग्यवश, राष्ट्रिय चलचित्र पुरस्कारको घोषणा र वितरणसँगै हरेक वर्षजस्तै यसपटक पनि विभिन्न खाले विवाद, असन्तुष्टि र प्रश्न उठेका छन् ।