मोदीखोलामा बाढीले पुल र रेष्टुरेन्ट बगायो

पोखरा । अविरल वर्षासँगै मोदी खोलामा आएको बाढीले कास्कीको पर्यटकीय क्षेत्र घान्द्रुकमा एउटा रेष्टुरेन्ट बगाएको छ भने अर्को रेष्टुरेन्टमा क्षति पुगेको छ । यसैगरी, बाढीले एउटा पुल बगाएको छ भने बाटो कटान गर्दा घान्द्रुक जोड्ने सडक पूर्णरुपमा अबरुद्ध भएको छ ।

गएरातिदेखि अविरल वर्षासँगै कास्कीको अन्नपूर्ण गाउँपालिकास्थित किम्रुङ खोलामा बाढी आएको थियो । उक्त खोला कास्की र पर्वत भई बग्ने मोदीखोलामा मिसिने गर्छ । बाढीले तल्लो तटीय क्षेत्रमा सम्भावित क्षति हुन नदिन पर्वतको मोदी र कास्कीको अन्नपूर्ण गाउँपालिकाले सतर्क गराएका छन् । उनीहरुले सार्वजनिक सूचना तथा माइकिङ गर्दै बहाव बढेको बेला खोलामा नजान, माछा नमार्न तथा दाउरा नटिप्न सचेत गराएका हुन् ।