भोटेकोशी बाढी : चीनतर्फ यसरी हुँदैछ खोजी तथा उद्धारको काम

बुधबार भोटेकोशी नदीमा आएको बाढी र पहिरोका कारण नेपालसँग सीमा जोडिएको चीनको सिजांग स्वायत्त क्षेत्रस्थित ग्याइरोङ बन्दरगाहमा ठूलो क्षति भएपछि चीनले खोजी तथा उद्धार अभियान तीव्र बनाएको छ।

प्रारम्भिक विवरणअनुसार ग्याइरोङ क्षेत्रमा तीन जनाको मृत्यु भएको छ भने २६५ जना बेपत्ता छन्। चिनियाँ राष्ट्रपति सी जिनपिङले बेपत्ता व्यक्तिहरूको खोजी तथा उद्धारलाई पहिलो प्राथमिकतामा राख्न निर्देशन दिएका छन्। उनले जोखिममा रहेका मानिसलाई सुरक्षित स्थानमा सार्न र घाइतेलाई समयमै उपचार उपलब्ध गराउन निर्देशन दिएका छन्। साथै, अनुगमन तथा पूर्वसूचना प्रणाली बलियो बनाउन, वैज्ञानिक ढंगले उद्धार कार्य सञ्चालन गर्न र थप विपत्ति हुन नदिन आवश्यक तयारी गर्न भनेका छन्।