बाउबाजेको सिको गर्दै कर्मकाण्डमा लागेका पुरोहितहरूलाई शास्त्रीय तालिम

काठमाडौँ । दाङका धेरै पुरोहितहरू पुस्तौँदेखि परम्परागत रूपमा कर्मकाण्ड गर्दै आए पनि औपचारिक अध्ययन र शास्त्रीय विधिको गहिरो ज्ञानबाट वञ्चित थिए। बाउबाजेले गरेको हेरेर र सुनेर पूजापाठ चलाउँदै आएका उनीहरूका लागि अहिले नेपाल संस्कृत विश्वविद्यालय अन्तर्गतको जनता विद्यापीठ बिजौरीले ६ महिने माध्यमिक तहको कर्मकाण्ड तालिम सञ्चालन गरेर नयाँ अवसर जुराइदिएको छ।

यो तालिमले परम्परागत पुरोहितहरूलाई शास्त्रीय ज्ञान र मन्त्रहरूको शुद्ध उच्चारण सिक्ने ठूलो माध्यम प्रदान गरेको छ। तुलसीपुर उपमहानगरपालिका–१२ टरिगाउँ निवासी यमराज उपाध्याय लामो समयदेखि पुरोहित कर्ममा संलग्न छन्। सामान्य अध्ययनका आधारमा जजमानी गर्दै आए पनि औपचारिक रूपमा कर्मकाण्ड सिक्न नपाएका उनी अहिले यो तालिममा जोडिएका छन्। "सामान्य अध्ययन त थियो, तर सबै विषयको गहिरो ज्ञान रहेनछ," उपाध्यायले अनुभव सुनाउँदै भने, "वर्षौंदेखि पुरोहित कर्म गर्दै आए पनि अहिले गुरुहरूबाट सिक्दा आफूले गरिरहेका कमीकमजोरी थाहा पाउने र शुद्ध उच्चारण गर्ने अवसर मिलेको छ।"