बुबाको कथा भन्ने फिल्ममा बा नै ठूलो रहस्य

आगामी भदौ १९ गते रिलिजमा आउने फिल्म बाः एक योद्धाका कलाकारलाई एक–एक गर्दै सार्वजनिक गरिए पनि कथाको केन्द्रमा रहेका ‘बा’ अर्थात् मुख्य पात्रलाई अझै रहस्यमै राखिएको छ।

नेपाली समाजको यथार्थलाई कथाको आधार बनाएको फिल्ममा परिवारमा सन्तानको भविष्यका लागि बुबाले गर्ने त्याग, संघर्ष र जीवनभर सामना गर्ने चुनौतीलाई फिल्मको मुख्य विषय बनाइएको छ। निर्माण पक्षले हालसम्म फिल्मका अधिकांश कलाकार सार्वजनिक गरिसकेको छ। केही दिनअघि मात्रै सागर खनाल, शिशिर शिवाकोटी, सुप्रिया शर्मा र शवि थापाको नाम सार्वजनिक गरिएको थियो। त्यसअघि झरना थापा, सुहाना थापा र अभिनेता दिव्यदेव पन्तलाई फिल्ममा अनुबन्ध भएको जानकारी दिइएको थियो। तर यी बाको परिचय भने गोप्य राखिएको छ।