बाढी र लेदोका कारण रसुवागढी जलविद्युत् आयोजना बन्द

काठमाडौँ । रसुवाको ल्हेन्दे खोलामा आइतबार साँझ पानीको सतह बढ्दै लेदो मिसिएको बाढी आउन थालेपछि पूर्वसावधानीस्वरूप १११ मेगावाट क्षमताको रसुवागढी जलविद्युत् आयोजनाको विद्युत् उत्पादन पूर्ण रूपमा बन्द गरिएको छ।

रसुवागढी जलविद्युत् केन्द्रका प्रमुख सन्तोष अधिकारीका अनुसार बाढीका कारण आयोजनामा हुन सक्ने सम्भावित क्षति र जोखिमलाई मध्यनजर गर्दै आइतबार साँझदेखि नै विद्युत् उत्पादन रोकिएको हो। गत वर्ष असार २४ गते ल्हेन्दे खोलामा आएको भीषण बाढीले आयोजनाको बाँध (ड्याम) सहित विभिन्न भौतिक संरचनामा ठूलो क्षति पुर्‍याएको थियो। लामो समयको मर्मत तथा पुनर्निर्माणपछि सञ्चालनमा आएको आयोजनामा पुनः क्षति नपुगोस् भन्नका लागि सुरुङतर्फ पानी लैजाने गेट (फ्लसिङ गेट) बन्द गरिएको प्राविधिकहरूले बताएका छन्।