सर्भर डाउन हुँदा यातायात कार्यालयको सेवा ठप्प, सेवाग्राही मर्कामा

केन्द्रीय सर्भर पाँच दिनदेखि अवरुद्ध हुँदा यातायात व्यवस्था कार्यालय चितवनबाट प्रदान हुने सवारी चालक अनुमतिपत्र (लाइसेन्स) सम्बन्धी सेवा प्रभावित भएको छ। नयाँ लाइसेन्स र नवीकरण लगायतका अधिकांश सेवा ठप्प भएपछि सेवाग्राहीले सास्ती खेप्नुपरेको छ।

बिहीबारदेखि सर्भर सञ्चालन नियमित नहुँदा काम हुन नसकेको कार्यालयले जानकारी दिएको छ। काम नहुँदा सेवा लिन बिहानैदेखि पुगेका सेवाग्राही दिनभर कुरेर पनि रित्तै फर्किन बाध्य भएका छन्। यातायात व्यवस्था कार्यालय चितवनका प्रमुख अमृत अधिकारीले केन्द्रीय प्रणालीमै समस्या आएका कारण कार्यालयबाट सेवा दिन नसकिएको बताए।