एक्यापले भन्योः ‘अन्नपूर्ण क्षेत्रको पदयात्रामा सचेत रहनु’

पदयात्राको सिजन नभएपनि यतिबेला अन्नपूर्ण क्षेत्रको घान्द्रुक, घोरेपानी, छोमरोङ, अन्नपूर्ण आधारशिविर (एबिसी)सम्म स्वदेशी र विदेशी पाहुना पदयात्राका लागि गएका छन्। तर, आइतबारको भीषण वर्षा र त्यसले निम्त्याएको बाढीका कारण पदयात्रा क्षेत्रमा त्रास छाएको छ। पदयात्राका लागि माथिल्लो भेग पुगिसकेका पर्यटकलाई पदयात्रामा सचेत रहन सरोकारवालाले अनुरोध पनि गरेका छन्।

कास्कीको अन्नपूर्ण गाउँपालिका–११ को किम्रुङ खोलामा आइतबार दिउँसो एकाएक बाढी आएको थियो। बाढीले किम्रुङ खोलाको झोलुंगे पुल बगाएको छ भने मोदीमा मिसिएपछि वीरेठाँटी–घान्द्रुक पदमार्गका रेस्टुरेन्टलाई पनि बगाएको छ। वीरेठाँटी–घान्द्रुक खण्डको करिब ३ सय मिटर सडक मोदीले क्षतविक्षत बनाउँदा सवारी आवागमन रोकिएको भएपनि शनिबार बेलुकी एकतर्फी खुला भएको अन्नपूर्ण गाउँपालिकाका अध्यक्ष विष्णुबहादुर केसीले जानकारी दिए।