अपाङ्गता भएका दाजुभाइलाई घरमै नागरिकता

जिल्ला प्रशासन कार्यालय खोटाङले अपाङ्गता भएका व्यक्तिको घरमै पुगेर नागरिक्ता प्रमाणपत्र प्रदान गरेको छ । जिल्लाको दिक्तेल रुपाकोट मझुवागढी नगरपालिका ८ लामीडाँडास्थित मानबहादुर खत्रीका दुई भाइ अपाङ्गता भएका छोराहरुलाई घरमै नागरिक्ता प्रमाणपत्र उपलब्ध गराइएको हो ।

प्रमुख जिल्ला अधिकारी रेखा कँडेल नेतृत्वको टोली मंगलबार लामीडाँडास्थित खत्रीको घरमै पुगेर मानबहादुरका छोराहरु २६ वर्षीय गणेश र २२ वर्षीय थीरबहादुरलाई नेपाली नागरिक्ताको प्रमाणपत्र प्रदान गरेको हो । शारीरिक अशक्तताका कारण जिल्ला प्रशासन कार्यालयसम्म आउन नसक्ने जानकारी पाएपछि उनीहरूलाई घरमै लगेर नागरिक्ता प्रमाणपत्र प्रदान गरेको प्रशासन कर्याालयका सूचना अधिकारी तथा सहायक प्रमुख जिल्ला अधिकारी कोपिला राईले बताईन् ।