शङ्कास्पद गाडी तेर्स्याइनु लोकतन्त्रका लागि शुभसंकेत होइन: बाबुराम भट्टराई

काठमाडौँ । पूर्वप्रधानमन्त्री बाबुराम भट्टराईले सञ्चारमाध्यम, प्रतिपक्षी दलका नेताको निवास तथा व्यवसायीका कार्यस्थल अगाडि नियोजित रूपमा शङ्कास्पद गाडीहरू राख्नु देशको लोकतान्त्रिक स्थिरता र समृद्धिका लागि शुभसंकेत नभएको बताएका छन् । सोमबार सामाजिक सञ्जाल फेसबुकमार्फत आफ्नो धारणा सार्वजनिक गर्दै उनले यस घटनाको गहिराइमा पुगेर सत्यतथ्य बुझ्न र गम्भीर प्रतिरोधात्मक कदम चाल्न सरकार तथा सरोकारवालाहरूसँग माग गरेका छन् ।

पूर्वप्रधानमन्त्री भट्टराईले लेखेका छन्, ‘प्रमुख सञ्चार माध्यमका कार्यालय, प्रमुख प्रतिपक्षी दलका सभापतिको निवास, उद्यमी(व्यवसायीका कार्यस्थल अगाडि नियोजित रूपले शङ्कास्पद गाडीहरू तेर्स्याएर कसले के संकेत गर्न खोजेको हो, त्यसको गहिराइमा गएर सत्यतथ्य बुझ्न र गम्भीर प्रतिरोधात्मक कदम चाल्न अत्यन्त जरुरी भएको छ । ’