क्रेनले उठाइएका गाडीहरु जरिवाना तिराएर छाडियो, ‘किन पार्किङ गरेको’ भनी सोधपुछ नै भएन

काठमाडौँ । काठमाडौँका विभिन्न सञ्चारमाध्यम र नेताको निवास अगाडि सोमबार शङ्कास्पद रूपमा सवारीसाधन पार्किङ गरिएको घटनाले दिनभर चर्चा पाएको छ । नेपाल पत्रकार महासंघ लगायतका सङ्घ–संस्थाले यसबारे गम्भीर छानबिन गर्न माग गरे पनि उपत्यका ट्राफिक प्रहरी कार्यालयले क्रेन प्रयोग गरेर उठाएका ती गाडीहरूलाई सामान्य जरिवाना तिराएर साँझ फिर्ता गरेको छ । तर, दिनभर यस विषयमा गम्भीर अनुसन्धान भइरहेको भनिए पनि साँझ गाडी लिन आउनेसँग ‘किन अनधिकृत पार्किङ गरेको?’ भनेर सामान्य सोधपुछ समेत नगरिएको पाइएको छ ।

सोमबार बिहान कान्तिपुर पब्लिकेशन, अनलाइनखबर, हिमालय टेलिभिजन, नेपाली कांग्रेसका सभापति गगन थापाको निवासको गेट र अनामनगरस्थित भाटभटेनी सुपर मार्केट अगाडि सवारीसाधनहरू बेवारिसे रूपमा छाडिएका थिए । बिहान गाडी छाडेर हिँडेकाहरू क्रेनले गाडी उठाएर रामशाहपथस्थित उपत्यका ट्राफिक प्रहरी कार्यालयमा पुर्‍याएको सूचना पाएपछि साँझ कार्यालय पुगेका थिए । उनीहरू अनधिकृत रूपमा पार्किङ गरेको कसुरमा जरिवानाको चिट काटेर आफ्ना गाडी लिई फर्किएका छन् ।