दुना टपरीमा समृद्धि खोज्दै महिला

दंगीशरण गाउँपालिका –२ कलमखोलाकी तिला पुनको लागि सालको पात अब वनमा खेर जाने वस्तु होइन । पात टिपेर घरनजिक रहेको उद्योगमा पुगेपछि उहाँको हातमा आम्दानी हुन्छ । घरायसी काम र घाँसदाउरामा सीमित उहाँको दैनिकी अहिले दुनाटपरी बनाउने कामसँग जोडिएको छ । आफ्नै गाउँमा काम पाउँदा घरखर्च चलाउन सहज भएको उहाँ बताउनुहुन्छ।

तिलाजस्तै कलमखोलाका २० जना स्थानीय अहिले सालको पातबाट दुनाटपरी बनाउने काममा जोडिएका छन् । गाउँमै सञ्चालन भएको दंगीशरण दुना टपरी उद्योगले स्थानीय वनमा पाइने सालका पातलाई उत्पादनसँग जोडेर रोजगारी र आम्दानीको अवसर सिर्जना गरेको हो। हाम्रो राजाकोट बहुउद्देश्यीय सहकारी संस्था लिमिटेडद्वारा सञ्चालित उद्योगले दुई वर्षदेखि सालका पातबाट दुना टपरी उत्पादन गर्दैआएको छ । राजाकोट–टिलकन्या सामुदायिक वनबाट सालका पात सङ्कलन गरी दैनिक करिब एक हजार पाँचसय थान दुना टपरी उत्पादन हुँदैआएको सहकारी संस्था लिमिटेड तथा उद्योगका प्रबन्धक चक्रमिलन विश्वकर्माले बताउनुभयो।