रेमिटेन्स पौने ६ खर्ब बढ्यो

मुलुको अर्थतन्त्रका आन्तरिक गतिविधि अझै अपेक्षित गतिमा चलायमान हुन नसके पनि बाह्य क्षेत्र भने थप बलियो बन्दै गएको छ। वैदेशिक रोजगारीमा गएका युवाले पठाएको विप्रेषण (रेमिटेन्स) ले मुलुकको अर्थतन्त्रलाई धानेको छ। पोहोरको तुलनामा रेमिटेन्स पौने ६ खर्ब रुपैयाँले बढेको छ।

चालु आर्थिक वर्ष २०८२/८३ को ११ महिना (जेठ मसान्तसम्म) विप्रेषण आप्रवाहले नयाँ कीर्तिमान कायम गर्दै २१ खर्ब २० अर्ब ८० करोड रुपैयाँ पुगेको छ। रेमिटेन्स आप्रवाह पोहोरको सोही अवधिको तुलनामा पाँच खर्ब ८६ अर्ब रुपैयाँले बढेको छ। नेपाल राष्ट्र बैंकले सोमबार सार्वजनिक गरेको चालु आवको ११ महिनाको ‘देशको वर्तमान आर्थिक तथा वित्तीय स्थिति’ प्रतिवेदनअनुसार समीक्षा अवधिमा विप्रेषण आप्रवाह ३८.२ प्रतिशतले बढेको हो। गत आर्थिक वर्ष २०८१/८२ को सोही अवधिमा विप्रेषण आप्रवाह १५.६ प्रतिशतले मात्रै वृद्धि भएको थियो।