जागेन देशमै रोजगारीको आशा

देशमा बढेको भ्रष्टाचार, राजनीतिक विसंगति र बेरोजगारी अन्त्यका लागि भनेर २३-२४ भदौ २०८२ मा जेन-जी आन्दोलन भयो। जेन-जी आन्दोलनकी नेत्री रक्षा बमका अनुसार त्यस आन्दोलनमा सहभागी हजारौँ युवामध्येमा एक थिए, मुगुको सोरु गाउँपालिका-१ का २५ वर्षीय गणेश नेपाली। देशमा परिवर्तन आउने आशा बोकेर आन्दोलनमा सहभागी भएको ठ्याक्कै १० महिनापछि र नयाँ सरकारले १०० दिन पूरा गरेको पाँच दिनपछि २५ असारमा उनै गणेशले आत्मदाह गरेर आफैँलाई सिध्याए।

जेन-जी आन्दोलनकै बलमा पुराना दल विस्थापित भएर राष्ट्रिय स्वतन्त्र पार्टी (रास्वपा)को दुईतिहाइ बहुमत नजिकको सरकार बन्यो। तर, गणेश नेपाली जस्ता युवाकै योगदानले परिवर्तन आए पनि तत्कालका लागि उनीहरूको जीवनमा खासै अन्तर भएन। आशा जगाउन पनि सकेन।