अर्थतन्त्रलाई गति दिने मौद्रिक नीतिको आधार

आर्थिक वर्ष २०८३/८४ को बजेटले उच्च, समावेशी र दिगो आर्थिक वृद्धिको महत्वाकांक्षी लक्ष्य निर्धारण गरेको छ । ७ प्रतिशत आर्थिक वृद्धिको लक्ष्य केवल सरकारी खर्चले मात्र हासिल गर्न सकिने विषय होइन । यसका लागि निजी क्षेत्रको लगानी, बैंकिङ प्रणालीको सक्रियता, उत्पादनमूलक क्षेत्रको विस्तार, वित्तीय प्रणालीको स्थायित्व तथा लगानीमैत्री वातावरणको समानान्तर विकास अपरिहार्य हुन्छ ।

यही सन्दर्भमा नेपाल राष्ट्र बैंकले सार्वजनिक गरेको मौद्रिक नीति बजेट कार्यान्वयनको बलियो सहयात्रीका रूपमा आएको छ । बजेटले देखाएको आर्थिक गन्तव्यमा पुग्न आवश्यक वित्तीय वातावरण निर्माण गर्ने उद्देश्यले ल्याइएको यो नीति अर्थतन्त्रलाई पुनः चलायमान बनाउने दिशामा केन्द्रित देखिन्छ ।