किन बढ्दै छ आत्म*हत्या ?

नेपालमा पछिल्ला वर्षमा आत्महत्या सार्वजनिक स्वास्थ्य र सामाजिक दुवै दृष्टिले गम्भीर चुनौतीका रूपमा देखिएको छ। प्रहरी प्रधान कार्यालयको तथ्यांकअनुसार आर्थिक वर्ष २०८०/८१ देखि २०८२/८३ को जेठ मसान्तसम्म देशभर २० हजार नौ सय ४७ आत्महत्याका घटना दर्ता भएका छन्। तथ्यांकले अधिकांश घटनामा झुन्डिएर आत्महत्या गरिएको देखाएको छ भने प्रदेशगत रूपमा कोसीमा सबैभन्दा धेरै र कर्णालीमा सबैभन्दा कम घटना दर्ता भएको पाइएको हो।

कर्णाली प्रदेशमा आत्महत्याका घटना कम देखिनुको एउटा कारण भौगोलिक विकटता, कम जनघनत्व तथा तुलनात्मक रूपमा कम जनसंख्या रहेको हुन सक्ने प्रहरी अधिकारीहरूको विश्लेषण छ। यद्यपि कम संख्या देखिनु मात्र पर्याप्त उपलब्धि नभई प्रत्येक घटना आफैंमा गम्भीर मानवीय क्षति भएकाले रोकथाममा निरन्तर ध्यान दिनुपर्ने अधिकारकर्मी तथा मनोविमर्शकर्ता शर्मिला बिसीले बताइन्।