सरकार भन्छ, ‘पर्याप्त मल छ’, किसान भन्छन्– हामीले पाएनौँ !

काठमाडौैँ । हरेक वर्ष धान रोपाइँको मुख्य सिजन सुरु हुनासाथ रासायनिक मलको चरम अभाव हुने पुरानो समस्या यस वर्ष पनि दोहोरिएको छ । असारको अन्तिमसम्म आइपुग्दा देशका अधिकांश धान उत्पादक जिल्लाका किसानले डीएपी र युरिया मल पाउन सकेका छैनन् । कतिपय जिल्लामा मल पुगेको छैन भने कतै कृषि सहकारीहरूमा पुगेको थोरै परिमाणको मल पनि केही घण्टामै सकिने गरेको छ ।

सीमावर्ती क्षेत्रका किसानहरूले भारतीय बजारबाट व्यक्तिगत रूपमा मल ल्याउन खोज्दा कानुनी झमेला बेहोर्नु परिरहेको छ भने अर्कोतर्फ सरकारले पर्याप्त मौज्दात रहेको दाबी गर्दै आएको छ ।