७८% नेपालीसँग छ आफ्नै मोबाइल, ९०% मा नेटवर्क पहुँच पुग्दा ४६% ले मात्रै चलाउँछन् इन्टरनेट

काठमाडौं । नेपालका ७८ प्रतिशतभन्दा बढी नागरिकको हातमा आफ्नै मोबाइल फोन पुगेको छ । अन्तर्राष्ट्रिय दूरसञ्चार सङ्घ (आईटीयू) ले हालै सार्वजनिक गरेको 'आईसीटी डेभलपमेन्ट इन्डेक्स (आईडीआई) २०२६' अनुसार नेपालको ७८.४ प्रतिशत जनसङ्ख्या मोबाइल फोनको पहुँचमा रहेको देखिएको हो ।

आवश्यक तथ्याङ्क उपलब्ध हुन नसक्दा विगत तीन वर्षदेखि विश्वव्यापी सूचकाङ्कको 'वरियता विहीन' सूचीमा रहेको नेपालले यसपटक १०० पूर्णाङ्कमा ६८.१ अंक प्राप्त गरेको छ । प्रतिवेदनअनुसार मोबाइल स्वामित्वको यो दरलाई अन्तर्राष्ट्रिय मापदण्डमा 'नर्मलाइज्ड स्कोर' गर्दा नेपालले १०० मा ८२.५ अंक हासिल गरेको छ ।