नारायणगढ–मुग्लिन सडकका १५ ठाउँको पहिरो हटाइयो, दुईतर्फी यातायात चालु

काठमाडौँ । नारायणगढ–मुग्लिन सडकखण्डको १५ फरक-फरक स्थानमा खसेको पहिरो पन्छाएपछि सडक दुईतर्फी रूपमा चालु भएको छ।

सोमबार दिउँसोदेखि सुरु भएको लगातारको वर्षात्का कारण साँझ ७ बजेदेखि विभिन्न ठाउँमा पहिरो खस्न थालेको थियो, जुन मंगलबार बिहानसम्मै जारी रह्यो। सडकमा थुप्रिएको पहिरो बिहान पूर्ण रूपमा हटाएपछि दुईतर्फी सवारी साधन सञ्चालनमा आएको डिभिजन सडक कार्यालय भरतपुरका इन्जिनियर अर्जुन घिमिरेले जानकारी दिए। सडक खुलाउन रातभर नै दुई वटा लोडरसहितका आवश्यक उपकरण र जनशक्ति परिचालन गरिएको थियो।