गण्डकीको बजेट खर्च ६४.२६ प्रतिशत

गण्डकी प्रदेश सरकारले चालु आर्थिक वर्षमा ६४ प्रतिशत मात्रै बजेट खर्च गरेको छ। गण्डकी प्रदेश सरकारले आर्थिक वर्ष २०८२/८३ मा कुल बजेटको ६४.२६ प्रतिशत खर्च गरेको हो। यो अघिल्लो वर्षको तुलनामा ५.२८ प्रतिशतले कम हो। आर्थिक वर्ष २०८१/८२ मा गण्डकी प्रदेशमा ६९.५४ प्रतिशत बजेट खर्च भएको थियो।

गण्डकी प्रदेशमा यस वर्ष भएको बजेट खर्च संघीयता कार्यान्वयनपछि सबैभन्दा कम हो। गण्डकीमा आर्थिक वर्ष २०७७/७८ मा सबैभन्दा कम ६६ प्रतिशत बजेट खर्च भएको थियो। यस वर्ष त्योभन्दा पनि झन्डै २ प्रतिशत कम खर्च भएको छ। आर्थिक वर्ष २०७८/७९ मा ७५ प्रतिशत, प्रदेश स्थापना भएको पहिलो आर्थिक वर्ष २०७५/७६ मा ६९ प्रतिशत, २०७६/७७ मा ७० प्रतिशत र २०७९/८० मा ७१ प्रतिशत बजेट खर्च भएको थियो।