कलेजो प्रत्यारोपण सेवा पुनः सुरु

शहीद धर्मभक्त राष्ट्रिय प्रत्यारोपण केन्द्र, दूधपाटी, भक्तपुरमा रोकिएको कलेजो प्रत्यारोपण सेवा पुनः सञ्चालनमा आएको छ। सेवा पुनः सुरु भएसँगै गरिएको पहिलो सफल कलेजो प्रत्यारोपणपछि कलेजो ग्रहणकर्ता गंगा श्रेष्ठ ११ दिनमै सकुशल डिस्चार्ज भएकी छन्।

केन्द्रका अनुसार असार १९ गते काठमाडौंको असन निवासी ३९ वर्षीया गंगा श्रेष्ठको कलेजो प्रत्यारोपण गरिएको थियो। उनलाई उनका ४७ वर्षीय देवर संजय श्रेष्ठले आफ्नो आधा कलेजो दान गरेका थिए। कलेजोदाता संजय श्रेष्ठ प्रत्यारोपणपछि छैटौँ दिन अर्थात् असार २५ गते नै अस्पतालबाट डिस्चार्ज भएका थिए। ग्रहणकर्ता गंगा श्रेष्ठ भने असार २९ गते स्वस्थ अवस्थामा घर फर्किएकी थिइन्।