भग्नावशेषभित्र भविष्यको आशा

प्रकृतिले कहिलेकाहीँ आफ्नो विराट् शक्तिको यस्तो परिचय दिन्छ, जहाँ मानिसले कोरेका सीमा, बनाएका संरचना र बुनेका योजनाहरू क्षणभरमै अर्थहीनजस्ता देखिन्छन् ।

भोटेकोशीको उर्लँदो भेलले घरका छाना मात्र बगाएको छैन, कतिपय परिवारका सपना, वर्षौँको श्रम र भविष्यका आशासमेत आफूसँगै बगाएको छ । पुलहरू भत्किएका छन्, बाटाहरू मेटिएका छन्, बस्तीहरू उजाडिएका छन् र अनेकौँ हृदयमा अपूरणीय शोकको कालो बादल मडारिएको छ ।