गण्डकीको सास्ती: बजेट पनि छैन, खर्च पनि हुँदैन !

पोखरा । चालु आर्थिक वर्षका लागि गण्डकी प्रदेश सरकारले ३१ अर्ब ९९ करोडको बजेट प्रस्तुत गरेको थियो । अन्तिम समयसम्म संशोधनसहित ३२ अर्ब ५ करोड बजेट प्रस्तुत भएको थियो, तर यो वर्ष प्रदेशको खर्च २० अर्ब ६० करोड रुपैयाँमात्रै भयो ।

चालु आर्थिक वर्ष गण्डकी सरकारको ११ अर्ब ४५ करोड रुपैयाँ खर्च हुन सकेन । प्रदेश सरकारले आगामी आर्थिक वर्ष (२०८३/०८४) को बजेट प्रस्तुत गर्दा चालु वर्षको कार्यक्रम कार्यान्वयन पश्चात बचत हुने २ अर्ब रुपैयाँ आगामी वर्षको बजेट स्रोत मानेको छ । प्रदेश कोष तथा लेखा नियन्त्रक कार्यालयका अनुसार, चालु वर्ष खर्च नभएर झन्डै साढे २ अर्ब रुपैयाँ मौज्दातका रूपमा रहन्छ । हिसाबको काम नटुङ्गिएकाले आर्थिक वर्ष सकिएपछि मात्रै यकिन तथ्याङ्क आउने कार्यालयले जनाएको छ ।