घातक विद्युतीय फोहोर

अहिले काठमाडौँसहित सहरी क्षेत्रका सडकमा विद्युतीय गाडी (ईभी) बाक्लै गुडिरहेको देखिन्छ। आर्थिक वर्ष २०७६/७७ सम्म सीमित संख्यामा भित्रिने गरेको ईभीको आयात पाँच वर्षयता लगातार उल्लेख्य मात्रामा बढिरहेको छ। भन्सार विभागका अनुसार आव २०७६/७७ मा दुईपांग्रेदेखि चारपांग्रेसम्मका ईभी दुई हजार ९४० वटा आयात भएका थिए। आव २०७७/७८ मा ईभीको आयात अघिल्लो वर्षभन्दा करिब तेब्बर बढेर ६ हजार ८५८ वटा पुग्यो। आव २०८१/८२ मा त ४४ हजार ५०९ वटा ईभी आयात भएको भन्सारको अभिलेख छ।

वातावरणीय र आर्थिक लाभको पाटो आफ्नो ठाउँमा छ, तर यति ह्वारह्वार्ती आयात भएर ईभीको बढ्दो प्रयोगबाट भविष्यमा उत्पादन हुने विद्युतीय फोहोर (ई-वेस्ट) व्यवस्थापनमा सरकारले ध्यान दिएकै छैन। निश्चित समयपछि ईभीको ब्याट्री काम लाग्दैन। यस्तै, पार्टपुर्जा फेर्नुपर्ने हुन्छ। पुराना ब्याट्री र पार्टपुर्जा कसरी विसर्जन गर्ने भन्ने रणनीति बनाउन वास्तै नगरी सरकार ईभीको प्रोत्साहनमा लागिरहेको छ।