अतिक्रमण र विवादमा अल्झिएको पोखरा बसपार्क निर्माणतर्फ

पोखरा । वि.सं. २०६१ माघ १९ गते पोखरा बसपार्कमा डोजर चल्यो । पोखरा अन्तर्राष्ट्रिय विमानस्थल निर्माणको क्रममा गरिएको जग्गा अधिग्रहणपछि पीडित बनेका जग्गावालालाई जग्गा दिनका लागि डोजर चलेको थियो । विमानस्थल निर्माणका लागि पोखरा बसपार्कको जग्गामा ल्याएर उनीहरुलाई थम्थम्याइयो । २०६१ माघदेखि २०६३ वैशाखसम्म सट्टाभर्नाबापत जग्गा वितरण भयो । पञ्चायतले एयरपोर्ट अघिल्तिरबाट सारेका व्यापारीलाई सहुलियत दरमा घडेरी बिक्री गरेको थियो ।

बसपार्कको लागि छुट्याइएको जग्गा सट्टाभर्नाबापत २० रोपनी ५ आना २ पैसा २ दाम जग्गा बाँडियो । त्यस्तै, १६ रोपनी १४ आना १ पैसा ३ दाम बसपार्ककै जग्गा ७४ जनालाई सहुलियत दरमा बिक्री गरियो । ५१ वर्षअघि पञ्चायतकालमा शुरू भएको पोखरा बसपार्क निर्माणको काम अझै हुन सकेको छैन । बसपार्कको लागि अधिग्रहण गरिएको जग्गामा निर्माणको काम हैन, नीतिगत भ्रष्टाचार र अतिक्रमण भएको छ । बसपार्कको लागि अधिग्रहण गरिएको २०५ रोपनी जग्गा पनि अब त करिब ४७ रोपनी मात्र बाँकी छ ।