१४ शिशुको मृत्युको अनुसन्धान सुरु

पाकिस्तानको राजधानी इस्लामाबादस्थित अस्पतालको नवजात शिशु कक्षमा आगलागी हुँदा १४ शिशुको मृत्यु भएपछि घटनाको कारण र सुरक्षा व्यवस्थाबारे अनुसन्धान सुरु भएको छ । प्रधानमन्त्री शाहबाज सरिफले गठन गर्नुभएको समितिले बिहीबार घटनास्थलको निरीक्षण गरी छानबिन अघि बढाएको छ ।

बुधबार बिहान पाकिस्तान इन्स्टिच्युट अफ मेडिकल साइन्सेजको तेस्रो तलामा रहेको नर्सरीमा आगलागी भएको थियो । आगो तीव्र रूपमा फैलिएपछि त्यहाँ रहेका १५ मध्ये एक शिशुलाई मात्र चिकित्सक, नर्स र अन्य कर्मचारीले उद्धार गर्न सकेका थिए । घटनापछि शोकाकुल परिवारले आगलागीको कारण तथा नर्सरीको अग्नि सुरक्षा व्यवस्थाबारे जवाफ मागेका छन् ।