भाेटेकाेशी बाढी: सड्दै शव, बढ्दै दुर्गन्ध

त्रिवि शिक्षण अस्पताल महाराजगन्जस्थित फरेन्सिक विभागको दृश्य बुधबार कोरोना महामारीको बेलाजस्तै देखियो। शव व्यवस्थापनमा खटिएकाहरू कोरोना कालमा जस्तै मास्क तथा सुरक्षा कवचमा थिए। खटिएका सुरक्षाकर्मी, आफन्तको शव खोज्न आएकाहरू र एम्बुलेन्स चालकहरू मास्कमा देखिन्थे। विभागको हाता सडेका शवले दुर्गन्धित बनेको थियो। शव खोज्दै आएकाहरू दुर्गन्धका कारण धेरै बेर टिक्न सक्दैनथे। बाध्यताले काम गर्ने कर्मचारी, प्रहरी तथा चालकहरूलाई भने दुर्गन्ध सहनुको विकल्प थिएन।

एम्बुलेन्स चालक सीताराम वली बुधबार दिउँसो नुवाकोटबाट शव लिएर आइपुगे। उनको एम्बुलेन्स रोकिनेबित्तिकै दुर्गन्ध थप कडा बन्यो। उनले रसुवामा बाढी आएको भोलिपल्टदेखि नै एम्बुलेन्समा शव बोक्न थालेका हुन्। उनी बुधबार त्रिशूली ब्यारेकबाट सेनाले संकलन गरेर पठाएको शव बोकेर फरेन्सिक विभाग आइपुगेका हुन्। ‘बाढी आएको तीन दिनपछि शव गनाउन थालेको हो, अहिले त कडा दुर्गन्ध आइरहेको छ,’ उनले भने, ‘तर बाध्यताले शव नबोकी सुखै छैन, तेब्बर मास्क लगाएर बोक्छु।’ उनका अनुसार नुवाकोटमा संकलन गरिएका थप डेढ दर्जन शव ल्याउन बाँकी छ।