उपत्यकामा ग्यास अभाव हुन नदिन बाहिरका प्लान्टबाटै सिलिन्डर भर्ने चटारो

चितवन – पृथ्वी राजमार्गको कृष्णभीरमा सडक भासिएपछि काठमाडौँ उपत्यकामा एलपी ग्यासको अभाव हुन नदिन उपत्यका बाहिरै सिलिन्डरमा ‘बोटलिङ’ गरेर पठाउन थालिएको छ। ग्यास बोकेका बुलेटहरू वैकल्पिक मार्गबाट पनि उपत्यका प्रवेश गर्न नसकेपछि बाहिरका उद्योगमै सिलिन्डर भरेर ट्रकमा राखी काठमाडौँ पठाउने व्यवस्था मिलाइएको हो।

नेपाल एलपी ग्यास उद्योग सङ्घका अध्यक्ष देवान चन्दका अनुसार आयल निगमले उपत्यका र छिमेकी जिल्लामा रहेका १६ उद्योगलाई बाहिरका उद्योगबाट ग्यास भर्न अनुमति दिएको छ। सोही अनुसार बारा, पर्सा, चितवन, मकवानपुर तथा नवलपरासीका ग्यास उद्योगहरूसँग समन्वय गरी सिलिन्डर भरेर त्रिभुवन राजपथ हुँदै उपत्यका पठाउन थालिएको छ।