लागुऔषध दुर्व्यसनीलाई अपराधी होइन, बिरामीका रूपमा हेरिने

काठमाडौँ । गृह मन्त्रालयले लागुऔषध नियन्त्रण र ओसारपसार विरुद्धको कार्ययोजनामा परिवर्तन गर्दै दुर्व्यसनीहरूलाई अपराधीको रूपमा नभई बिरामीका रूपमा व्यवहार गर्ने नीति अघि सारेको छ । लागुऔषध नियन्त्रण तथा ओसारपसार विरुद्धको अन्तर्राष्ट्रिय दिवसका अवसरमा आयोजित कार्यक्रममा बोल्दै मुख्य लागुऔषध नियन्त्रण अधिकारी एवं सहसचिव सुमन घिमिरेले सरकारको आगामी रणनीति र वर्तमान अवस्थाबारे जानकारी गराएका हुन् ।

सहसचिव घिमिरेका अनुसार लागुऔषधको प्रयोग परम्परागत प्राकृतिक स्रोत अर्थात् गाँजा र अफिमबाट रूपान्तरण भई सिन्थेटिक र फर्मास्युटिकल औषधिहरूको दुरुपयोगतर्फ मोडिएको छ । आर्थिक वर्ष २०८१/८२ मा मात्र ७ हजार ९ सय ४३ जना पक्राउ परेका थिए, जसले लागुऔषधको बढ्दो सञ्जाललाई पुष्टि गर्छ ।