एनभीएल विजेतालाई २० लाख

काठमाडौं : नेपाल भलिबल लिग (एनभीएल) को पहिलो संस्करणको विजेताले २० लाख रुपैयाँ नगद पुरस्कार पाउने भएको छ । आयोजक केडिया ग्रुपका अनुसार यो पुरस्कार राशि नेपाली घरेलु भलिबल इतिहासकै सर्वाधिक हो । एनभीएलले पहिलो संस्करणमै विजेता टोलीका लागि २० लाख रुपैयाँ पुरस्कार घोषणा गर्दै घरेलु भलिबलमा नयाँ कीर्तिमान कायम गरेको जनाएको छ ।

केडिया ग्रुपका प्रबन्ध निर्देशक अश्विन केडियाले प्रतियोगिताको कुल पुरस्कार ३२ लाख रुपैयाँ रहेको बताउदै बाँकी १२ लाख उपविजेता, विभिन्न सात विधाका उत्कृष्ट र हरेक खेलको प्लेयर अफ द म्याचको नगद पुरस्कारका लागि विनियोजन गरिएको बताए ।