विशेष परिस्थितिमा नागरिकलाई सैन्य तालिम दिने तयारी

सरकारले विद्यालय तहका विद्यार्थीलाई मात्र केन्द्रित गर्दै आएको राष्ट्रिय सेवा दलको दायरा व्यापक रूपमा विस्तार गर्ने तयारीमा जुटेको छ । विशेष परिस्थिति, युद्ध वा आन्तरिक द्वन्द्वको समयमा जुनसुकै नेपाली नागरिकलाई सैन्य तालिम दिई राष्ट्रसेवामा खटाउन सकिने गरी सरकारले नयाँ विधेयक संघीय संसद्मा दर्ता गरेको छ ।

केही दिनअघि प्रतिनिधिसभामा दर्ता भएको यस विधेयकले साबिकको राष्ट्रिय सेवा दल ऐन २०२७ लाई पूर्ण रूपमा प्रतिस्थापन गर्दै राष्ट्रिय सुरक्षा र सेवामा नागरिकलाई आकस्मिक रूपमा परिचालन गर्ने नयाँ कानुनी बाटो खोलेको छ ।