जुम्लामा पहिलो लागुपदार्थ परीक्षणमै ८ मध्ये ५ चालक ‘पोजिटिभ’

जुम्लामा पहिलोपटक सवारी चालकमाथि गरिएको लागुपदार्थ परीक्षणमै झण्डै दुईतिहाइ चालक ‘पोजिटिभ’ भेटिएका छन्। जिल्ला ट्राफिक प्रहरी कार्यालय र जिल्ला प्रहरी कार्यालय जुम्लाले बिहीबार दिउँसो २ बजेदेखि सञ्चालन गरेको संयुक्त विशेष चेकजाँचका क्रममा परीक्षण गरिएका ८ जना चालकमध्ये ५ जनाले लागुपदार्थ सेवन गरी सवारी चलाइरहेको पुष्टि भएको हो। यसले जिल्लाको सडक सुरक्षा तथा लागू पदार्थको बढ्दो प्रयोगप्रति गम्भीर चिन्ता थपेको छ।

जिल्ला ट्राफिक प्रहरी कार्यालयका प्रमुख जगतबहादुर कठायतका अनुसार पहिलो दिन अटो, मोटरसाइकल, ट्र्याक्टर तथा अन्य सवारीका चालकलाई शंकाका आधारमा मादक पदार्थ र लागुपदार्थ परीक्षण गरिएको थियो। परीक्षणको नतिजाले जुम्लामा सवारी चालकबीच लागुपदार्थको प्रयोग बढ्दो अवस्थामा रहेको संकेत गरेको उनले बताए।