विपिन आचार्यको प्रस्ताव : शून्य समयमा उठेका विषयहरू अभिलेखमा मात्र सीमित नगरियोस्

काठमाडौँ । राष्ट्रिय स्वतन्त्र पार्टी (रास्वपा) का सांसद विपिनकुमार आचार्यले संसदमा शून्य समयलाई ब्ल्याक होल समय राख्न प्रस्ताव गरेका छन् । बिहीबार संसद्को शून्य समयमा बोलेका उनले यदि जनताका पीडा र देशका मुद्दा संसद्ले सुन्नुपर्नेमा जोड दिए ।

‘यदि यो शून्य समयमा हामीले बोलेका कुरा सुनिन्छन्, टिपिन्छन् र कार्यान्वयनको प्रक्रियामा जान्छन् भने यसलाई शून्य समय होइन, पूर्ण समय भनौँ। तर यदि जनताका पीडा, सांसदका प्रश्न र देशका मुद्दाहरू जति बोले पनि शून्यमा शून्यसरि बिलाएर जाने हुन् भने यसको नाम शून्य समय होइन, ब्ल्याक होल समय राखौँ । ब्ल्याक होलमा प्रकाश समेत हराएझैँ, संसदमा नागरिकको आवाज, जनप्रतिनिधिको जबाफदेहिता र सरकारको जिम्मेवारी हराउनु हुँदैन’, आचार्यले भने ।