उपत्यकामा २४ हजारभन्दा बढी ग्यास सिलिन्डर भित्रिँदै, उद्धार कार्यका लागि इन्धन आपूर्ति तीव्र

काठमाडौं । पृथ्वी राजमार्गको कृष्णभीर खण्ड अवरुद्ध भएपछि नेपाल आयल निगमले त्रिभुवन राजपथ (बाइरोड) को वैकल्पिक मार्ग प्रयोग गरी काठमाडौं उपत्यका तथा आसपासका जिल्लामा पेट्रोलियम पदार्थ र एलपी ग्यासको आपूर्ति व्यवस्था मिलाएको छ ।

गत भदौ १४ गते त्रिशूली नदीको कटानका कारण कृष्णभीर खण्डमा सडक भासिएपछि पेट्रोलियम ट्याङ्कर तथा ग्यास बुलेट आवतजावत रोकिएकाले निगमले वैकल्पिक रुट प्रयोगमा ल्याएको हो । एलपी ग्यास उद्योगहरूले तराईका डिपोबाट सिलिन्डर भरेर सोही बाटो हुँदै काठमाडौं ल्याइरहेका छन् । आज मात्रै उपत्यकाका लागि विभिन्न ब्रान्डका करिब २४ हजार ५०० सिलिन्डर भित्र्याइएको र भोलिदेखि यो क्रम थप परिमाणमा नियमित गरिने निगमले जनाएको छ ।