राष्ट्र बैंकले तोकेकै क्षेत्रमा अत्यधिक खराब कर्जा, वित्तीय संस्थाको खराब कर्जा ५४ अर्ब ८ करोड

काठमाडौं । नेपाल राष्ट्र बैंकले निश्चित प्रतिशत तोकेरै ऋण प्रवाह गर्नुपर्ने भनी बैंक तथा वित्तीय संस्थालाई निर्देशन दिएका क्षेत्रमा प्रवाह भएको ऋणमा समस्या देखिएको छ । गत चैतसम्मको कुल खराब कर्जामध्ये कृषि र मत्स्यपालनको हिस्सा मात्र करिब साढे २३ प्रतिशत छ। जलविद्युत् आयोजनालगायत निर्माण क्षेत्रको हिस्सा करिब साढे १० प्रतिशत छ। खराब कर्जामा थोक तथा खुद्रा व्यापारको हिस्सा करिब १० प्रतिशत छ।

तोकिएको क्षेत्रमा कर्जा प्रवाह नगरे नियामक निकायको कारबाही भोग्नुपर्ने र बैंक तथा वित्तीय संस्थाले पनि कर्जाको गुणस्तर सम्बन्धमा आँखा चिम्लिने, अर्थतन्त्र चलायमान नहुँदा कृषिसँगै लघु, साना तथा मझौला उद्यमी सबैभन्दा छिटो प्रभावित हुनेलगायत कारण यस्तो भएको जानकार बताउँछन्।