पश्चिम नेपालका नदीहरूमा बहाव बढ्ने, सतर्कता अपनाउन आग्रह

काठमाडौँ । देशका विभिन्न भागका नदी तथा खोलाहरूमा आज पानीको बहाव बढ्ने बाढी पूर्वानुमान महाशाखाले जनाएको छ। विशेषगरी पश्चिम नेपालका केही साना नदी तथा खोलाहरूमा बहाव उल्लेख्य रूपमा बढ्न सक्ने भएकाले स्थानीयवासीलाई विशेष सतर्कता अपनाउन आग्रह गरिएको छ।

महाशाखाका अनुसार आज कास्की, पर्वत, म्याग्दी, बर्दिया, कैलाली लगायत आसपासका जिल्ला भई बग्ने साना नदी तथा खोलाहरूमा पानीको बहाव उल्लेख्य बढ्ने पूर्वानुमान गरिएको छ। यी क्षेत्रका कतिपय खोलाहरूमा आकस्मिक बाढी (फ्ल्यास फ्लड) को समेत न्यून जोखिम रहेको महाशाखाले बुलेटिनमार्फत जनाएको छ।