११ जिल्लामा बर्डफ्लूको संक्रमण, उच्च सतर्कता अपनाउन आग्रह

काठमाडौं– नेपालका ११ जिल्लामा बर्डफ्लू (एभियन इन्फ्लुएन्जा) को संक्रमण पुष्टि भएपछि पशु सेवा विभागले रोग नियन्त्रण तथा रोकथामका लागि उच्च सतर्कता अपनाएको छ। विभागले संक्रमण देखिए पनि आवश्यक सावधानी अपनाउँदा आत्तिनुपर्ने अवस्था नरहेको भन्दै किसान र उपभोक्तालाई सचेत रहन आग्रह गरेको छ।

कृषि, वन तथा वातावरण मन्त्रालयअन्तर्गतको पशु सेवा विभागका महानिर्देशक उमेश दाहालका अनुसार बर्डफ्लू मुख्यतः जंगली पन्छी, बसाइँ सर्ने चराचुरुङ्गी तथा कागमार्फत फैलिने भएकाले व्यावसायिक कुखुरा फार्ममा जैविक सुरक्षा (बायो–सेक्युरिटी) कडाइका साथ लागू गर्न आवश्यक छ।