नयाँ फिजियोथेरापी कोड अफ इथिक्सले 'लेबल बी' अभ्यासमाथि प्रश्नचिन्ह

नेपाल हेल्थ प्रोफेसनल काउन्सिलद्वारा हालै जारी गरिएको नयाँ फिजियोथेरापी कोड अफ इथिक्स तथा स्कोप अफ प्राक्टिसले मुलुकको फिजियोथेरापी क्षेत्रमा एउटा गम्भीर र पेचिलो बहस सिर्जना गरेको छ। विशेषगरी प्राविधिक प्रमाणपत्र तह (CPT/PCL Physiotherapy) उत्तीर्ण गरेका स्वास्थ्यकर्मीहरूको स्वतन्त्र अभ्यास सम्बन्धी अधिकारलाई संकुचित र बन्देज लगाउने नीतिगत व्यवस्था अघि सारिएपछि यसले हजारौँ पेशाकर्मीको भविष्य मात्र होइन, स्वास्थ्य सेवाको पहुँच र नियामक न्यायमाथि नै ठूलो प्रश्नचिन्ह खडा गरिदिएको छ।

यो विषय केवल दुईवटा शैक्षिक तह वा समूहबीचको प्राविधिक वा पेशागत विवाद मात्र होइन। यसको अन्तर्य नेपालको संविधानले प्रत्याभूत गरेको स्वास्थ्यको मौलिक हक, समानताको सिद्धान्त, पेशा-रोजगारीको स्वतन्त्रता र राष्ट्रिय स्वास्थ्य नीति २०७६ को मर्मसँग जोडिएको छ। राज्य स्वयंले दिएको मान्यता र अधिकारलाई एउटा नियामक निकायको निर्णयले एकाएक उल्ट्याउन खोज्दा यसले कानुनी र व्यावहारिक दुवै संकट निम्त्याउने निश्चित छ।