नेपालको शीर्ष चार होड जीवन्त

स्पिनर सन्दीप लामिछानेले अस्ट्रेलियन बलर मिचेल स्टार्कको कीर्तिमान भंग गरेको दिन नेपालले आइसिसी विश्वकप लिग–२ को त्रिकोणात्मक शृंखलामा स्कटल्यान्डमाथि जित निकालेको छ।

कीर्तिपुरमा सोमबार भएको खेलमा स्पिनरद्वय सन्दीप र ललितनारायण राजवंशी चम्किँदा नेपालले स्कटल्यान्डमाथि ६ विकेटको जित निकाल्दै लिग–२ को अंकतालिकामा शीर्ष चार होड जीवन्त राखेको छ। लिग–२ को अंकतालिकामा स्कटल्यान्ड र अमेरिका शीर्ष दुई स्थानमा छन्। यही टोली सम्मिलित शृंखलामा नेपालले तीन खेलबाट दोस्रो जित आत्मसात् गर्‍यो। नेपालले २७ खेलबाट २२ अंक छ। आठ राष्ट्र सम्मिलित लिग–२ को अंकतालिकामा नेपाल पाँचौं स्थानमा उक्लिएको छ। साथै नेपालले नामिबिया र क्यानडालाई पछि पारेको छ। नामिबियाको २८ खेलबाट २२ अंक र क्यानडाको २४ खेलबाटै २१ अंक छ। शीर्ष चारभित्र अटाउन नेपाल अझै चार अंकले पछाडि छ।