प्लाटिनमको प्रयोगबिनै सस्तोमा हाइड्रोजन इन्धन उत्पादन गर्ने नयाँ प्रविधि

५ वैशाख, काठमाडौं । वैज्ञानिकहरूले महँगो प्लाटिनम धातुको प्रयोग नगरीकन स्वच्छ र नवीकरणीय हाइड्रोजन इन्धन उत्पादन गर्ने एउटा सस्तो र टिकाउ विधि पत्ता लगाएका छन्। ‘वासिङ्टन युनिभर्सिटी इन सेन्ट लुइस’ का अनुसन्धानकर्ताहरूले विकास गरेको यो नयाँ प्रविधिले भविष्यमा स्वच्छ ऊर्जाको लागत घटाउन र यसलाई व्यावसायिक रूपमा ठूलो परिमाणमा उत्पादन गर्न महत्त्वपूर्ण सहयोग पुर्‍याउने विश्वास गरिएको छ।

सौर्य वा वायु ऊर्जा जस्ता नवीकरणीय स्रोतबाट बिजुली निकालेर पानीलाई हाइड्रोजन र अक्सिजनमा टुक्र्याउने प्रविधिलाई ‘वाटर इलेक्ट्रोलाइजर’ भनिन्छ। यस प्रक्रियाबाट उत्पादित हाइड्रोजन पूर्ण रूपमा प्रदूषणरहित र स्वच्छ इन्धनका रूपमा प्रयोग हुन्छ। तर, हालसम्म पानी टुक्र्याउने यो प्रणालीमा ‘प्लाटिनम’ समूहका अत्यन्तै महँगा धातुहरू क्याथोडका रूपमा प्रयोग गर्नुपर्ने भएकाले स्वच्छ हाइड्रोजन इन्धनको उत्पादन लागत निकै उच्च थियो।