वित्तीय अपराधमा ३ अदालतमा ८६ जना विरुद्ध मुद्दा दायर, २७ अर्ब ८० करोड बिगो दाबी

काठमाडौं । शंकर समूह, इन्फिनिटी होल्डिङ्स र हिमालयन रि–इन्स्योरेन्सका सञ्चालकसहित ८६ जनाविरुद्ध २७ अर्ब ८० करोड बिगो दाबी गर्दै तीन अदालतमा चारवटा वित्तीय अपराधका मुद्दा दायर गरिएको छ। मुख्य अभियुक्तका रूपमा दीपक भट्ट र शंकर समूहका तीन सञ्चालकलाई देखाइएको छ, जसमा धितोपत्र, बिमा, सम्पत्ति शुद्धीकरण र बैंकिङ कसुरसम्बन्धी अभियोग लगाइएको छ।

वित्तीय घोटाला अभियोगमा शंकर समूह, इन्फिनिटी होल्डिङ्स र हिमालयन रि–इन्स्योरेन्सका सञ्चालकलगायत विरुद्ध बिहीबार एकै दिन तीन अदालतमा मुद्दा दायर भएको छ। जिल्ला अदालत काठमाडौंमा धितोपत्र कसुरमा ८१ र बिमा कसुरमा ४२ जनाविरुद्ध मुद्दा चलाइएको छ। सम्पत्ति शुद्धीकरण कसुरमा ३९ जनाविरुद्ध विशेष अदालत र बैंकिङ कसुरमा ४ जनाविरुद्ध उच्च अदालत पाटनमा मुद्दा लगिएको छ।