विपद् व्यवस्थापनमा तत्काल २० अर्ब परिचालन, थप २५ अर्ब जुटाउँदै सरकार

काठमाडौं । तिब्बतबाट आएको बाढीले पुर्‍याएको क्षति व्यवस्थापनका लागि सरकारले तत्काल परिचालन गर्न सकिने गरी करिब २० अर्ब रुपैयाँको स्रोत सुनिश्चित गरेको छ। उद्धार, राहत र प्रारम्भिक पुनर्स्थापनाका लागि प्रधानमन्त्री राहत कोष र गृह मन्त्रालयमार्फत आवश्यकताअनुसार रकम खर्च गर्ने व्यवस्था मिलाइएको अर्थ मन्त्रालयले जनाएको छ।

सरकारले आन्तरिक स्रोतसँगै बाह्य सहयोग जुटाउने तयारी पनि तीव्र पारेको छ। विश्व बैंकको ‘क्याट डिडीओ र्‍यापिड रेस्पोन्स’ सुविधामार्फत करिब २५ अर्ब रुपैयाँ बराबरको सहयोग प्राप्त गर्ने प्रक्रिया अघि बढाइएको छ। उक्त रकम परिचालनका लागि आवश्यक खरिद प्रक्रिया अगाडि बढाउन सम्बन्धित निकायलाई भनिएको छ।