विपत्तिमा देखिएको नेपाली मन

प्रलयकारी रसुवा बाढीले ठूलो जनधनको क्षति गरेको छ । कतिपय परिवार घरबारविहीन भएका छन्, कतिपयले आफन्त गुमाएका छन् । कसैको घर बगेको छ, कसैको व्यवसाय, रोजगारी र वर्षौँको मेहनतले बनाएको सम्पत्ति क्षणभरमै माटोमा मिसिएको छ । प्राकृतिक विपत्तिले नेपाली समाजलाई फेरि एकपटक गहिरो चोट दिएको छ । तर विपत्तिले पीडा मात्रै दिएको छैन, नेपाली समाजको अर्को सुन्दर पक्ष पनि उजागर गरेको छ । संकटमा नेपालीजन फेरि एकपटक एक–अर्काको साथमा उभिएका छन् । सरकार उद्धार तथा राहतमा जुटेको छ ।

विभिन्न संघसंस्था, कलाकार, व्यवसायी, सामाजिक अभियन्ता र सर्वसाधारण प्रभावितको घाउमा मलहम लगाउन अघि बढेका छन् । देशभित्र मात्रै होइन, विदेशमा रहेका नेपालीहरूले समेत प्रधानमन्त्री दैवी प्रकोप उद्धार कोषमा रकम जम्मा गरेर आफ्नो ऐक्यबद्धता मात्रै प्रस्तुत गरेका छैनन्, पीडितको घाउमा मलहम लगाउने प्रयास पनि गरेका छन् । कसैले राहत सामग्री प्रभावित क्षेत्रमा पठाएका छन्, कसैले आफैँ पुगेर वितरण गरेका छन् । कसैले आफ्नो क्षमताअनुसार आर्थिक सहयोग गरेका छन् । कसैले श्रम दिएका छन् । सहयोगको स्वरूप फरक होला, तर उद्देश्य एउटै छ– पीडामा परेका नेपालीका घाउमा मलहम लगाइदिनु ।