१७ इन्टरनेट प्रदायकलाई प्राधिकरणको अन्तिम चेतावनी, १५ दिनभित्र चित्तबुझ्दो स्पष्टीकरण नदिए लाइसेन्स खारेज

काठमाडौँ । नेपाल दूरसञ्चार प्राधिकरणले नियमानुसार बुझाउनुपर्ने रोयल्टी, ग्रामीण दूरसञ्चार विकास कोष (आरटीडीएफ) बापतको रकम र लेखा परीक्षण गरिएको वित्तीय विवरण नबुझाउने १७ वटा इन्टरनेट सेवा प्रदायकहरू (आईएसपी) लाई अन्तिम चेतावनी दिएको छ । मङ्गलबार एक सार्वजनिक सूचना जारी गर्दै प्राधिकरणले ती कम्पनीहरूलाई १५ दिनभित्र आधिकारिक सफाइ (स्पष्टीकरण) पेस गर्न निर्देशन दिएको हो ।

प्राधिकरणका अनुसार यी सेवा प्रदायकहरूले विगत केही आर्थिक वर्षदेखि नियमानुसार बुझाउनुपर्ने रकम बुझाएका छैनन् भने प्राधिकरणको सम्पर्कमा समेत आएका छैनन् । यसअघि पटक–पटक पत्राचार र सार्वजनिक सूचना मार्फत सूचित गर्दा पनि उनीहरूले आफ्नो दायित्व पुरा नगरेको प्राधिकरणले जनाएको छ ।