मुद्दा खारेजीको माग गर्दै ओपनएआईले भन्योः च्याटजीपीटी वकिल होइन, एउटा उपकरण मात्र हो

काठमाडौँ । आर्टिफिसियल इन्टेलिजेन्स (एआई) कम्पनी ओपनएआईले आफ्नो प्लेटफर्म च्याटजीपीटीले अनधिकृत रूपमा कानुनी सल्लाह दिएको भन्दै दायर गरिएको मुद्दा खारेज गर्न अदालत समक्ष आग्रह गरेको छ । निप्पन लाइफ इन्स्योरेन्स कम्पनी अफ अमेरिकाले दायर गरेको उक्त मुद्दाको विरुद्धमा ओपनएआईले अमेरिकाको सिकागोस्थित सङ्घीय अदालतमा निवेदन दर्ता गराएको हो ।

निप्पन लाइफ इन्स्योरेन्सले च्याटजीपीटीले ग्रासिएला डेला टोरे नामक एक महिलालाई उनको अपाङ्गता सम्बन्धी मुद्दा पुनः खोल्न र अदालतमा दर्जनौँ अनावश्यक निवेदनहरू दर्ता गर्न सहयोग पुर्‍याएको आरोप लगाएको थियो । बीमा कम्पनीको दाबी अनुसार च्याटजीपीटीको सहयोगमा ती महिलाले आफ्नो पुरानो कानुनी सम्झौता उल्लङ्घन गरेकी थिइन्, जसले गर्दा कम्पनीलाई अनावश्यक कानुनी झमेला आइलागेको छ ।