‘कामु प्रधानन्यायाधीशको आदेश होइन निर्देशन हो, मान्नुपर्ने बाध्यता छैन’

काठमाडौँ । अहिले न्यायपालिका, कार्यकापालिका र व्यवस्थापिकाबिच त्रिपक्षीय टकराव देखिन्छ । सरकारले अध्यादेश जारी गर्ने तयारी गरेसँगै सबैभन्दा बढी आशंका न्यायपालिकामा थियो । भावी प्रधानन्यायाधीश परम्परा र चलिआएको अभ्यासकै निरन्तर दिएर हुन्छ कि क्रमभंगता हुन सक्छ ? भन्ने बहस चलेको थियो ।

जब संवैधानिक परिषद्ले प्रधानन्यायाधीश सिफारिस गर्दा क्रमभंगताको बाटो लियो, बहस चर्केर गयो । कायममुकायम प्रधानन्यायाधीश सपना प्रधान मल्लले कानुन दिवसका दिन कार्यपालिका र व्यवस्थापिका लक्षित कडा अभिव्यक्ति दिएपछि विवाद टकरावकै स्थितिमा पुग्यो । संवैधानिक परिषद्ले प्रधानन्यायाधीशमा सिफारिस गरेका डा. मनुजकुमार शर्माविरुद्ध अदालतमा दिएको निवेदन सर्वोच्च प्रशासनले दरपीठ गरेपछि र कामु प्रधानन्यायाधीशले त्यही निवेदन दर्ता गर्न आदेश दिएपछि विवाद उत्कर्षतिर जाँदैछ । नेपाल बार एसोसिएसन त्यसविरुद्ध आन्दोलनमै उत्रिएको छ ।